Heddal Stavkyrkje

Kyrkja er eit fascinerande døme på korleis gudshus vart skapte i tidleg kristen tid. Arkitektur og treskadering viser ein merkverdig kombinasjon av bibelske motiv og førkristen tru. Langs svalgangen kan du sjå fantastiske treskaderingar rundt dei fire inngangsdørene. Kraftige symbol er utforma for å skremma bort vonde makter og invitera folk inn i heilagdomen til kyrkja. Éi dør er for menn, éi for kvinner, éi for presteskapet og éi i vest for prosesjonar. I dag er vestinngangen den einaste som er i bruk. I svalgangsveggen er det også rissa inn runer, bomarke og ein erkebispkross. Det har vore fleire rekonstruksjonar av denne kyrkja. Den siste, i åra 1952–1954, søkte å gjenreisa henne slik ho såg ut i mellomalderen. I dagens kyrkje kan ein sjå element frå dei ulike hundreåra. Her er røkelseskar frå mellomalderen, eit altar frå 1667, i tillegg til benker og lampar frå 1950. Veggane i skipet er målte med blomsterdekorasjonar frå 1600-talet. Apostlar i full figur dekorerer koret. Frå toppen av søylene smiler 23 venlege maskehovud frå mellomalderen ned mot kyrkjelyden. Opphavleg stod det tre særmerkte møblar i koret, som alle hadde motiv frå segna om Sigurd Fåvnesbane. Denne myten har fungert som eit bindeledd mellom heidenske forteljingar og kristen lære. Bispestolen står her framleis, med utskjeringar som førestiller Brynhild, og friarane hennar Gunnar og Sigurd på kvar si side. Ein kopi av den originale «Brugde-benken» er også utstilt. Fronten er dekorert med buster av Sigurd og Brynhild. På baksida ser vi «Gunnar i ormegarden». Det er også laga ein kopi av den såkalla «Klokkarpulten», ein storslått lesepult med utskjeringar som viser Sigurd mellom ei løve og ein drake. Nær stavkyrkja ligg Låvekyrkja, som inneheld både eit rom for gudstenester, ein kafé og ulike tematiske utstillingar. I gangavstand frå kyrkja ligg også Heddal bygdetun, eit friluftsmuseum med gamle gardshus og skiftande utstillingar.